طريقة استرجاع الهاتف المسروق قانونيا… هشام ملولي

تكنولوجيا

طريقة استرجاع الهاتف المسروق قانونيا…

أي واحد فينا تشفر ليه تيليفون او كيعرف شي واحد تسرق ليه، ولكن قليل فينا لي كيعرف شي واحد ديكلارا اي دار شكاية عند الشرطة. هاد الشي هو الديفو لي كنديروا.

كل واحد فينا كيسمع بالشرطة العلمية ولكن عمرنا مكملنا الجملة وقلنا الشرطة العلمية والتقنية.

اجي نفصلو هاد التقنية مزيان ؟

التقنية أي مواكبة التقنيات الحديثة من اجهزة وحواسيب او غيرها، الشرطة التقنية عندهم مصلحة مكلفة فقط بتتبع الهواتف وفك تشفيرها ومراقبة المكالمات.

الشفار ملي كيسرق  الهاتف كيفورماطيه وكيخدم نمرة من نوامر ديال هاد البلاد، ملي كتخدم اي نمرة فالتيليفون راه أوتوماتيكياً كتعرف عند الشرطة التقنية او الوكالة الوطنية لتقنين المواصلات (ANRT).

غادين تقولوا كيفاش عرفوا النمرة ؟

جرب تركب فالتليفون ديالك (#06#*)، غادي يطلع ليك واحد الرقم سميتوا الايمي (IMEI)، هاد الرقم لي طلع ليك عندك نتا بوحدك فالعالم كامل او ميمكنش يتبدل .. لحد الساعة تفاهمنا، مزيان.

اذن كنطلب من اي واحد يحط هاد الرقم فالأجوندا ديالوا، ولي معندوش كونطرا ديال لاكارط سيم يمشي يديرها.

الأن تشفر ليك تيليفون ونتا عندك هاد جوج سوارت شنو غادي دير ؟

اولا غادي تسول فين كاين لابيجي ديال البوليس (الشرطة القضائية) واي مدينة فيها البوليس عندها مركز ديال لابيجي، غادي تمشي عندهم وغادي تدير شكاية انك تشفرتي بالسلاح الابيض او اي عنف واجهك وغادي تقوليهم عندي الرقم التسلسلي ديال الهاتف غادين ياخدوه وغادين يسيفطوه لعند الشرطة العلمية والتقنية او من بعد ايام غادين يعيطوا ليك وغادين يجبدو ليك اخر الارقام والمحادثات وغادي يتسناو منك تقوليهم هذا تليفوني…

من بعد غادين يجيبوا الشفار ولا لي شراه من عندوا في حالة التماطل كاين وكيل الملك كاتدير عندو شكاية وكاتابع الملف ديالك بطريقة قانونية.

تصورو كون كولشي كايدير هادشي، شحال ديال الشفارة غادي يديرو بناقص من سرقة الهواتف على الأقل وغادي تكون ساهمتي في الحفاظ على الأمن ❤💪👍

_____
هشام ملولي، الشرطة الوطنية المغربية

ملاك

مدونة مغربية.

  • 380
    Shares